Кыргызстандык мушкер Самат Абдырахманов мээлейсиз, муштум менен урушкан Hardcore Fighting Championship уюмунун Гран-при мелдешинин чейрек финалындагы атаандашы менен көз караштар таймашына чыкты. Мушкерлердин бири-биринин көзүн теше караган учурунун видеосун аталган уюм өзүнүн YouTube каналына жарыялады.
Самат Абдырахманов 8/1 финалда россиялык Гор Туманянды, ага чейинки этапта башкыртстандык Вячеслав Орловду нокаутка кетирип уткан.
"Кыргыз" жана "Кыргыз Флойду" каймана ысымдары бар Абдырахманов мелдештин башында Анатолий Скрыпник менен кез келип, аны эсинен тандырып жеңген.
Hardcore Fighting Championship уюмунун экинчи сезонунда ар кайсы салмак категориялары боюнча тандалма мелдештер өтөт. Финалга чыккандар гран-при үчүн ат салышат. Биринчи орунду алган спортчуга — BMW автоунаасы, экинчиге — бир миллион рубль, үчүнчүгө 500 миң рубль акчалай сыйлык берилет.