БИШКЕК, 9-авг. — Sputnik. Милиция курчоого алган "Айчүрөк" дүр-дүйнө дүкөнүнө (ЦУМ) бомба коюлуп, барымтага алынгандар бар деген маалымат чындыкка дал келбейт. Бул тууралуу ЦУМдун коопсуздук кызматынын жетекчиси Виктор Жирков журналисттерге билдирди.
Анын айтымында, маалымат тастыкталбагандан кийин соода борбору ачылды.
"Саат 15:55те милицияга жашыруун билдирүү түшкөн. Муну бизге Свердлов райондук милициясынан айтышты. Чалгандар соода борборунун ажатканасында жарылуучу зат бар экенин айтышыптыр, бирок каягында экени түшүнүксүз. Биз коопсуздук үчүн коноктор менен кызматкерлерди сыртка чыгардык. Эч ким барымтага алынган эмес. Атайын кызматтагылар бардыгын текшерип чыгышты. Кудайга шүгүр, эч нерсе табылган жок, баары жакшы", — деди Жирков.
УКМК дагы ЦУМда барымтага алынгандар бар деген маалыматты төгүндөдү. Учурда чекисттер милиционерлер менен чогуу жалган билдирүү тараткандарды аныктоо боюнча ыкчам-издөө иштерин жүргүзүүдө.
Эске салсак, жанараак борбор калаадагы "Айчүрөк" дүр-дүйнө дүкөнү (ЦУМ) курчоого алынып, ичиндегилер эвакуацияланып баштаган. Милиция саат 16:00дөр чамасында ЦУМда шек жараткан кара кийимчен аял жүргөнү боюнча маалымат түшкөнүн билдирген.