БИШКЕК, 8-авг. — Sputnik. Өзбекстандын президенти Шавкат Мирзиёев кайрадан мамлекет башчы болууга талапкерлигин койду. Бул тууралуу Sputnik Өзбекстан агенттиги жазды.
Маалыматка ылайык, Ташкентте өкмөт башчы Абдулла Ариповдун катышуусунда Өзбекстандын Либерал-демократиялык партиясынын кезектеги жыйыны өтүп, партиянын саясий кеңешинин мүчөсү жана азыркы мамлекет башчы Шавкат Мирзиёевдин талапкерлигин көрсөтүү чечими кабыл алынган.
Башка партиялар да президенттикке талапкерлерин аныкташкан. Өзбекстан элдик-демократиялык партиясынан Максуда Ворисова, "Миллий тикланиш" демократиялык партиясынан Алишер Кадыров, Өзбекстандын экологиялык партиясынан Нарзулло Обломуродов жана "Адолат" социал-демократиялык партиясынан Бахром Абдухалимов ат салышат.
Коңшу өлкөдө президенттик шайлоо ушул жылдын 24-октябрында өтөт. Шайлоо кампаниясы расмий түрдө 23-июлдан тарта башталган.