БИШКЕК, 6-авг. — Sputnik. Өзбекстанда президенттик шайлоого экинчи талапкер болуп "Адолат" социал-демократтар партиясынан Бахром Абдухалимов аттанды. Бул тууралуу Sputnik Өзбекстан агенттиги жазды.
62 жаштагы Абдухалимов тарых илимдеринин доктору. Окумуштуу 2011-жылдан бери Өзбекстандын Илимдер академиясынын вице-президенти болуп келген. "Адолат" партиясынын лидерлигине 2020-жылдын октябрь айында дайындалган.
Ага чейин президенттик жарышка катышат деген ниет менен Өзбекстандын Экологиялык партиясы өздөрүнүн аткаруу комитетинин төрагасы Нарзулло Обломуродовдун талапкерлигин сунушташкан. Ал киши аталган саясий бирикмени ушул жылдын февраль айынан тарта жетектей баштаган.
Ал эми Өзбекстандын учурдагы лидери Шавкат Мирзиёев президенттик шайлоого талапкерлигин коюу боюнча азырынча расмий билдире элек.
Коңшу өлкөдө президенттик шайлоо ушул жылдын 24-октябрында өтөт. Шайлоо кампаниясы расмий түрдө 23-июлдан тарта башталган.
Бул өзгөртүүлөр киргизилген Шайлоо кодексинин негизинде өткөрүлүп жаткан алгачкы добуш берүү болмокчу. Эми чет өлкөдө жүргөн, жашы жеткен ар бир өзбекстандык консулдук каттоодо турган-турбаганына карабай добуш бере алат. Ошондой эле үгүт иштери учурунда талапкерлер теле аркылуу дебаттарга чыгышат.