БИШКЕК, 4-авг. — Sputnik. Жогорку Кеңештин депутаты Дастан Бекешев Аскер прокуратурасына сурак берип чыкты. Бул туурасында ал Telegram каналына жазды.
Бүгүн эртең менен Кумтөр кенин иштетүүдө Лысый жана Давыдов мөңгүлөрүн талкалап алтын казууга уруксат берген мыйзамдын кабыл алынышы боюнча сураларын айткан.
"2016 же 2017-жылы биз Суу кодексин өзгөртүү боюнча добуш бергенбиз. Мен анда каршы добуш бергем. Себеби мөңгүлөрдү "Кумтөргө" бербеш керек деп эсептейм. Бирок көпчүлүгү колдогон. Балким ушундан улам кандайдыр бир коррупция болгонбу деп чукуп жатышат окшойт. Негизи берген добушу үчүн депутат укуктук жопокерчиликке тартылбашы керек, ал эми моралдык жоопкерчилик, албетте, бар", — деп айткан Бекешев.
Ошондой эле ал сурак бир сааттай убакытка созулганын билдирди. Депутат суроолор орундуу, так берилгенин белгилеп, жалпысынан Суу кодексин өзгөртүү боюнча сурашканын айтты.
Ал эми суракты жалпыга жарыялабоо боюнча тил катка кол коюп чыкканына байланыштуу кенен маалымат бере албастыгын белгиледи.