БИШКЕК, 3-авг. — Sputnik. ӨКМ түндө Кемин шаарында бир эле күйүүчү май куюучу жайдан өрт чыкканы тууралуу эки ирет чакыруу түшкөнүн билдирди.
Маалыматка ылайык, жолдун жээгиндеги Red Petroleum май куйган бекетинде (Бишкек — Нарын — Торугарт жолунун 97-чакырымында) турган жүк ташуучу Mercedes Benz унаасынан өрт чыгып, толук күйүп кеткен.
"Жалын май куюучу жайдын бир колонкасына да өтүп, оператордун бөлмөсү, ичинде жайгашкан дүкөнү жана темир калай менен жабылган бастырмасы күйгөн. Өрттүн жалпы аянты болжол менен 220 чарчы метрди түзөт", — деп айтылат ммалыматта.
Жалын саат 23:40та чектөөгө алынып, 04:36да толук өчүрүлгөн.
ӨКМдин маалыматы боюнча, дал ушул эле дарекке саат 05:50 чамасында өрт тууралуу дагы бир чакыруу түшкөн.
"Күйүүчү май куюучу жайдын металл менен жабылган чатырынын 10 чарчы метри күйгөн. Жалын саат 6:10до чектөөгө алынды", — деп айтылат маалыматта.
Мындан жабыркагандар жок. Өрттүн чыгуу себеби такталууда.