БИШКЕК, 2-авг. — Sputnik. Калыстар Олимпиаданын жарым финалында кыргызстандык балбан Айпери Медет кызы менен күрөшкөн америкалык спортчу Аделина Мария Грейге жан тарткан жок.
Мындай пикирин Азиянын күрөш федерациясынын вице-президенти Мелис Турганбаев менен Спорттун олимпиадалык түрү боюнча дирекциянын башчысы Нурлан Исмаилов социалдык тармак аркылуу билдирди. Видеокомментарийлерин президенттик администрациянын билим берүү, илим, маданият, спорт жана жаштар бөлүмүнүн башчысы Галина Байтерек Facebook баракчасында билдирди.
Мелис Турганбаев калыстардын коллегиясы беттешти кайталап көрүп чыкканын айтты.
"Ал жакта (күрөш аянтчасында) 16 башка ракурстагы камералар турат. Калыстардын коллегиясы чогулуп, видеолорду көрүп, талаш-тартыш маселелерди карап чыкты. Биздин реферилер да катышты. Бир гана Айперинин эмес, башка спортчулардын да кармаштарын көрүп чыгышты. Упай бербей коюу, тартуу деген болбоптур. Көйгөй жок", — деди Турганбаев.
Нурлан Исмаилов да спортчуларга туура баа берилгенин билдирди.
"Эч кандай тартуу болгон жок, туура баа берилди. Бирок талашып-тартыша турчу учур жаралды. Туура кабыл алыңыздар. Айперинин келечеги кең, бул дагы бир сабак болот деп ишенем. Дагы даражасы көтөрүлөт. Коло байге үчүн күрөшкөнү турат, дем-күч берели", — деди дирекциянын башчысы.
Медет кызы аялдар арасындагы күрөш боюнча Олимпиада мелдешинин коло байгеси үчүн түркиялык Ясемин Адар менен кармашат.