Быйыл жаздын эрте келиши жана кургакчылык эгин талааларына сезилерлик зыян алып келди. 12000 гектар жерге кызылча үрөнү себилсе, катаал аба ырайынан улам 500-600 гектарына чыкпай калып, ордуна жүгөрү айдалды. Бул тууралуу Жигитали Жумалиев Sputnik Кыргызстан радиосунда маек куруп жатып билдирди.
Анын айтымында, учурда кылкандуу дан эгиндерин оруп, жыйноо 50 пайызга жыйынтыкталып калды.
"Быйыл жаз эрте келип, анан да кургакчылык болуп дыйкандар кыйналды. Өзгөчө Чүй өрөөнү сугат иштерин убагында жүргүзө албай, эми түшүмдү күткөндөн аз ала турган болушууда. Ушуга байланыштуу кийинки жылдарда эгиндин күйүп кетүүсүнө жол бербөө үчүн Советтер Союзунан калган эски скважиналарды кайрадан калыбына келтирүү иштери колго алынууда. Азырынча Чүй облусунда 63 скважина жана Баткенде бир нечеси оңдоп-түзөөдөн өтүүдө. Бул багытта министрлер кабинети атайын акча бөлгөн. Кийинки жылдардан республиканын башка облустарында да иш жүргүзүлөт", — деди Жумалиев.
Ал тамчылатып сугарууну өркүндөтүү да заман талабы болуп турганын кошумчалады.