БИШКЕК, 23-июл. — Sputnik. Бишкекте 22-июлдан тарта COVID-19га каршы AstraZeneca вакцинасы менен эмдөө башталды. Бул тууралуу Республикалык штабдан билдиришти.
Маалыматка караганда, препаратты 18 жаштан жогорку курактагы бардык жарандар 4-12 жума аралык менен эки дозасын ала алат.
"Аталган вакцинаны Бишкек шаарындагы № 2, 3, 5, 7, 15 үй-бүлөлүк медициналык борборлорунан жана студенттер үчүн бейтапканадан алууга болот", — дешти штабдан.
AstraZeneca аймактарга келерки жумадан тарта жеткиликтүү болот. Учурда жеткирилип жатканы айтылды.
Аймактарга бөлүнгөн доза:
- Бишкек – 10 миң доза;
- Ош – 2 миң;
- Чүй облусу – 10 миң;
- Жалал-Абад облусу – 4 миң;
- Ысык-Көл облусу – 4 миң;
- Нарын облусу – 2 миң;
- Талас облусу – 2 миң;
- Баткен облусу – 2 миң;
- Ош облусу – 4 миң.
Эске салсак, 16-июлда Азербайжан Кыргызстанга гумжардам катары AstraZeneca вакцинасынын 40 миң дозасын (20 миң адамга жетет) берген.
AstraZeneca Оксфорд университети менен кызматташуу аркылуу шведдик-британдык фармацевтикалык компания тарабынан жасалган.