БИШКЕК, 18-июл. — Sputnik. Токио Олимпиадасында кыргызстандык балбандардан алгачкы болуп грек-рим күрөшүнүн балбаны Жоламан Шаршенбеков кармашка чыгат. Оюндардын программасы уюштуруу комитетинин расмий сайтына чыккан.
Ага ылайык, 1-августта 60 килограмм салмактагы балбандар арасында 2020-жылдагы Дүйнө кубогунун жеңүүчүсү Шаршенбеков килемге чыгат.
Ал эми кыздар күрөшүнөн эң оор, 76 килограмм салмакта Айпери Медет кызы ат салышат. Айтылуу балбан кыз Айсулуу Тыныбекованын 3-августта килемге чыгары былтыр эле белгилүү болгон.
Жадыбал боюнча спорттук күрөштөр 1-августта башталып, 7-августка чейин созулат. 1-3-августта грек-рим жана кыздар күрөшү болсо, 4-августта эркин күрөш башталат.
Кыргызстандан Токио Олимпиадасына жалпысынан 16 спортчу барса, анын тогузу күрөш чеберлери. Төртөө грек-рим, экөө эркин жана үчөө кыз-келиндер күрөшүнүн балбандары экени маалым.