БИШКЕК, 17-июл. — Sputnik. Катар мамлекетинин Доха шаарында Афганистандын тирешип турган саясий күчтөрүнүн ортосунда сүйлөшүүлөрдүн кезектеги раунду өтүп жатат. Бул тууралуу РИА Новости жазды.
Маалыматка караганда, сүйлөшүүлөр жабык режимде өтүүдө.
"Буга чейин Афганистандын Tolo News телеканалы өз маалымат булактарына таянып билдиргенине караганда, Доха шаарына өлкөнүн экс-президенти Хамид Карзай менен Улутту элдештирүү боюнча жогорку кеңештин башчысы Абдулла Абдулла "Талибан"* кыймылы менен сүйлөшүүлөрдү жүргүзүү үчүн барары айтылган", — деп жазылат кабарда.
Афган өкмөтүнүн делегациясынын курамында 2020-жылдын сентябрдагы сүйлөшүүлөрдөн кийин алгачкы жолу мындай жогорку кызмат адамдары болуп жатканы айтылды. Ал эми талибандардын башында бул кыймылдын Катардагы кеңсесинин жетекчиси Барадар Ахунд турганы кошумчаланды.
Эл аралык ЖМКлардын жазганына караганда, тараптар өткөөл өкмөттүн курамын бекитүү, туткундарды алмашуу жана ок атууну токтотуу боюнча сүйлөшүүлөрдү жүргүзүүдө.
Учурда Афганистандан НАТО күчтөрү акырындык менен чыгып кетип жатат. Мындан улам бир катар өлкөлөрдө тыюу салынган террордук уюм деп эсептелген "Талибан"* өкмөттүк күчтөр менен тирешүүдө.
*Талибан – бир катар өлкөлөрдө тыюу салынган террордук уюм.