БИШКЕК, 16-июл. — Sputnik. Ысык-Көл биосфералык аймагынын дирекциясы быйылкы жайдагы туристтик маалга даярданып, көлдүн бетин таштанды менен балык кармаган торлордон тазалап чыкты. Бул туурасында аймактык кабарчы билдирди.
Бул ирет кытай өндүрүшүнөн чыккан, кароосуз жаткан ар кыл узундуктагы 35 торду көлдүн түбүнөн алып чыгышкан. Дирекция кызматкерлери тазалоо иштерин "Таза Ысык-Көл" коомдук фондунун дайверлери менен биргеликте Тоң районундагы Ак-Терек аймагында жүргүзгөн.
Ысык-Көл биосфералык аймагынын дирекциясынан мындай иштерди көлдүн акваториясында туристтик маал башталганда жана аяктаганда жыл сайын жасап турушарын айтышты.