БИШКЕК, 15-июл. — Sputnik. Кыргызстандык жөө күлүк Юлия Андреева Токиодо боло турган Олимпиада оюндарына катышуудан баш тартты. Бул тууралуу Жеңил атлетика федерациясынын башкы катчысы Иван Щербаков билдирди.
Эске салсак, Андреева төрт жылда бир өтө турган маанилүү оюнга экинчи болуп (биринчи суучул Денис Петрашов) жолдомо алган эле.
"Ал мурда эле баш тартканын айткан. Эмне себеп болгонун билбейбиз. Биринчи федерациянын президентине, андан кийин башкы машыктыруучуга айтыптыр. Биз Улуттук олимпиада комитетине аны курама командадан чыгаруу боюнча кат жибергенбиз", — деди Щербаков.
Тактоочу суроо узатканыбызда ал "бул акыркы чечим, мындан ары эч нерсе кыла албайбыз" деп жооп берди.
Андреева 1984-жылы туулган. Жеңил атлетика менен 14 жашынан бери машыгып келет. Буга чейин Пекин (2008), Лондон (2012) жана Рио-де-Жанейродо (2016) өткөн Олимпиадаларга катышкан.