БИШКЕК, 15-июл. — Sputnik. Ош облусунда имамдардын диний билим деңгээлин жогорулатуу максатында окуу сабактары башталды. Бул тууралуу муфтияттын маалымат кызматы кабарлады.
Ага ылайык, кечээ облустук мусулмандар казыятынын жыйындар залында мечит имамдарына алгачкы окуу сабагы уюштурулган. Иш-чарага казыяттын эмгек жамааты, райондордун башкы имам-хатибдери жана Кара-Суу районунун имамдары катышкан.
Ош облустук казысынын орун басары Нурбек кары Орунбаев коомдун өсүп-өнүгүүсү үчүн илим-билим алуунун зарылдыгы чоң экенин белгилеген.
"Ал эми облус казысы Сайдамир ажы Жейналиев мусулман коомчулугунда, анын ичинде салттуу ханафи мазхабы жана матуриди акыйдасында таасирдүү болгон китептерден сабак берди", — деп айтылат маалыматта.
Аталган окутуулар буга чейин Жалал-Абад, Өзгөн жана Кара-Суу шаарларында өткөрүлүп келсе, эми облустун башка аймагында да улантылат.