БИШКЕК, 14-июл. — Sputnik. Жаштар иши, дене тарбия жана спорт агенттиги Токиодогу Олимпиадага бара турчу атлеттердин спорттук кийимдерин көрсөттү.
Курама команданын экипировкасын Кытайдын TECTOP компаниясы бекер даярдап берген. Форманын топтомуна 15 кийим кирген: бир нече футболка, атайын кофталар, ветровка, бут кийим, баш кийим жана башкалар бар.
Мындай форманы спортчулар Олимпиада кыштагында жүргөндө, машыкканда жана сыйлык аларда кийишет.
Ошондой эле жарыштарга кийип чыгуучу атайын спорттук кийими бар. Аларды улуттук Bigser sport компаниясы тигип берген. Спорт агенттиги алардын сүрөтүн кийинчерээк берерин убадалады.
Ал эми курама команданын параддык формасын дизайнер Дилбар Ашимбаева тиккен. Бирок ак чапан жана ага басылган сакура коомчулукта ар кыл пикирди жаратып, Улуттук Олимпида комитети буга түшүндүрмө берген.