БИШКЕК, 8-июл. — Sputnik. Бишкек шаардык милициясы уурдалган "Сапат" лицейлер тармагынын президенти Орхан Инанды Түркиянын да, Кыргызстандын да паспортун колдонуп жүргөнүн билдирди.
Милициянын маалыматына ылайык, Инанды Түркиянын жарандыгы тууралуу паспорту болуп туруп 2012-жылы 28-июнда Кыргызстандын ID, ал эми 25-декабрда жалпы жарандык паспортун алган.
"Орхан Инанды Кыргызстандын паспортун алгандан кийин Түркиянын паспортун колдонуп 27 жолу чек арадан өткөн. Тагыраак айтканда, 2014-2018-жылдары Кыргызстандан Азербайжан, Казакстан, Бириккен Араб Эмирлиги, Россия, Түркия жана Индияга учкан. Ал паспортунун мөөнөтү 2024-жылдын 27-июнуна чейин жарактуу болгон. Ал эми 2018-жылдан кийин кыргыз паспортун 9 жолу колдонуп, Россия, Казакстан жана Индияга учуп турган", — деп айтылат маалыматта.
Муну менен Инанды эки мамлекеттин тең паспортун колдонуп жүргөнү айтылат.
"Ошол эле учурда Орхан Инанды Түркияда туулуп өскөнүн жана Түркиянын жарандыгынан баш тартпаганын белгилей кетүү керек", — деп билидиришти милициядан.
Мындан сырткары, тиешелүү кызматтар тарабынан 2019-жылы Инандынын кыргыз паспортун алышынын мыйзамдуулугу боюнча сотко чейинки өндүрүш ачылып, иликтене баштаганы белгиленди.