БИШКЕК, 7-июл. — Sputnik. Билим берүү жана илим министрлиги I жана II топтогу майыптарды өлкөнүн жогорку окуу жайларына кабыл алуудагы босого баллды төмөндөттү. Бул тууралуу министрликтин маалымат кызматы билдирди.
Бул кадам Бириккен Улуттар Уюмунун Майыптардын укуктары жөнүндө конвенциясынын, Кыргызстанда инклюзивдик билим берүүнү өнүктүрүү концепциясынын жана программасынын ченемдерин ишке ашыруу, ошондой эле ден соолугунан мүмкүнчүлүгү чектелген адамдардын жогорку билим алуу мүмкүнчүлүгүн кеңейтүү максатында жасалган.
"Ошентип гранттык орундарга босого балл негизги тест боюнча 100 балл, акы төлөп окутуунун бардык формаларына босого балл негизги тест боюнча 95 деп белгиленди", — деп айтылат билдирүүдө.
Буга чейин босого балл бюджеттик бөлүмдө 110, контракт менен билим алгандар үчүн 105 болчу.
Белгилей кетсек, азыркы билим берүү системасы инсандын жекече билим алуу муктаждыктарына дал келүүсүнө жана ден соолугунан мүмкүнчүлүгү чектелген адамдарды окутууга бирдей шарттарды камтыган инклюзияны өнүктүрүүгө багытталган.