БИШКЕК, 7-июл. — Sputnik. Гаитиде президенттин резиденциясына кол салуу болуп, мамлекет башчы Жовенель Моиз көз жумду. Бул тууралуу Gazette Haiti порталына шилтеме берип РИА Новости жазды.
Премьер-министрдин милдетин аткаруучу Клод Жозеф президентке ок тийип, канайым дагы жаракат алганын, кийинчерээк ал дагы көз жумганын билдирген. Маалыматка караганда, резиденцияга бир нече белгисиз адам кол салган. Алардын айрымдары испан тилинде сүйлөшкөн.
Бул мамлекет башчынын өмүрүнө коркунуч жаралган алгачкы учур эмес. Ушул жылдын февраль айында полиция мамлекеттик төңкөрүш кылууга аракет кылгандарды токтотуп калган.
53 жаштагы Моиз дүйнөдөгү эң жакыр өлкөлөрдүн сап башында турган Гаитиге 2015-жылы президент болуп шайланган. Бирок атаандаштары шайлоонун жыйынтыгын тааныбай, териштирүүлөр болуп отуруп, 2016-жылдын аягында кайрадан добуш берүү болгон. Анда дагы утуп алган Моиз расмий түрдө 2017-жылдын февраль айынан тарта иштей баштаган.