БИШКЕК, 6-июл. — Sputnik. Дүйнөлүк саламаттык сактоо уюмунун саламаттык сактоо жаатындагы өзгөчө кырдаалдар боюнча программасынын директору Майкл Райан коронавирус инфекциясынын жайылышы боюнча кырдаал "өтө жогорку деңгээлде" турукташканын билдирди. Бул тууралуу аталган уюмга шилтеме берүү менен РИА Новости жазды.
"Эгерде оорунун графигин карай турган болсок, акыркы жумаларда турукташуу болгонун, бирок бул өтө жогорку деңгээлде ишке ашканын көрүүгө болот", — деди Райан.
Ошондой эле ал айрым мамлекеттерде оору кескин азайганын, ошол эле учурда кээ бир мамлекеттерде өсүү байкалып жатканын кошумчалаган. Бул коронавирустун башка штаммдары пайда болуп жатканы, эпидемияга каршы чаралардын жумшартылганы жана элдин байланышы көбөйгөнү менен байланыштуу экенин айткан.
ДССУнун чукул оорулар боюнча бөлүмүнүн башчысы Мария Ван Керкхове кырдаал "эки ача" мүнөзгө ээ деген. Анын айтымында, Түндүк жана Түштүк Америкада вирус азайганы менен башка континенттерде жуктуруп алгандардын саны өсүүдө.