БИШКЕК, 6-июл. — Sputnik. Бишкектин чок ортосунда жайгашкан борбордук "Айчүрөк" дүр-дүйнө дүкөнүнүн жанындагы фонтандын ортосунда өсүп турган мажүрүм талдардын бир бөлүгүн кыйып жатышат. Бул тууралуу Sputnik Кыргызстанга соода борбордун директору Михаил Михин айтып берди.
Социалдык тармактарда фонтандагы мажүрүм талдарды кимдир-бирөөлөр кыйып жаткандыктарын жазышкан. Мэриядан бактар менчик аянтта болгондуктан, ал иштер менен "Жашыл чарба" алектенбегендигин билдиришти.
Михин "Айчүрөктүн" администрациясы куурап калгандарын кыйып жатканын, себеби ал кишини басып калышы мүмкүн экендигин айтты.
"Кургап жана чирип калгандары бар экен. "Жашыл чарбага" кыйып берүүнү өтүнүп кат жазсам, ал менчик жер экендигин билдирип, башка сунуштарын айтышты. Былтыр коронавирустан улам кыйбай калганбыз. 2019-жылы аталган ишкананын кызматкерлерине бактардын кооптуу жерлерин көрсөткөм. Бир жума мурда эле бир бутагы сынып түштү, дагы жакшы айланасында эч ким жок болуп калды. Андыктан ушундай кадамга барууну, тагыраагы, аларды кыюуну чечтик", — деп түшүндүрдү башкы директор.
Михин мажүрүм талдардын үч же төртөө кыйылганын айтты. 2016-жылы дарактарды кыйып салуу боюнча маселе көтөрүлүп, бирок анда атайын жабдуулар менен бекемдешкенин кошумчалады.
Аталган дүкөндүн администрациясынан фонтандар 1974-жылы "Айчүрөк" курулганда аны менен кошо орнотулуп, талдар да ошол жылы отургузулганын айтышты.