БИШКЕК, 5-июл. — Sputnik. Россия президенти Владимир Путин тажикстандык кесиптеши Эмомали Рахмон менен тегефон аркылуу тажик-афган чек арасындагы оор кырдаалды талкуулады. Бул тууралуу Кремлдин маалымат кызматынан билдиришти.
"Путин тажик-афган чек арасындагы оор кырдаалга байланыштуу Жамааттык коопсуздук келишим уюмунун жана эки тараптуу кызматташтыктын негизинде Тажикстанга колдоо көрсөтүүгө даяр экенин билдирди”, — деп айтылат билдирүүдө.
Эске салсак, Афганистанда өкмөттүк күчтөр менен талибдердин тиреши жүрүп жатат. Ушул тапта талибдер аймактардын көпчүлүк бөлүгүн ээлеп алып, ири шаарларды басып алууга аракет кылууда.
РИА Новости агенттигине Тажикстандын Улуттук коопсуздук боюнча мамлекеттик комитетинин өздүк маалымат булактары билдиргенине караганда, чек ара сызыгынын 70 пайыздан ашыгын талибандар көзөмөлдөп турат.
Мындан улам Рахмон мамлекеттин коопсуздугун камсыздоо үчүн Коопсуздук кеңешинин мүчөлөрүнө, күч органдарынын жетекчилерине конкреттүү кадамдарды сунуштоону тапшырды.
Ошондой эле өз жарандарынын коопсуздугу жана чек арадагы мыйзам бузуулардын алдын алуу үчүн тажик-афган чек арасына 20 миң аскер кызматкерин мобилизациялоо боюнча чечим кабыл алынды.