БИШКЕК, 2-июл. — Sputnik. Волейбол боюнча улуттук курама команданын капитаны Оңолбек Каныбек уулу менен Кундуз Карыпбекова экөө баш кошту. Маалыматты Sputnik маалымат агенттигине спортчу өзү тастыктады.
Волейбол боюнча улуттук курама команданын капитаны Оңолбек Каныбек уулу менен Кундуз Карыпбекова экөө баш кошту
© Фото / предоставлено Онолбеком Каныбек уулу
Спортчунун үлпөт тою кечээ Бишкектеги тойканалардын биринде өткөн.
Жубайы Кундуз менен Медициналык академияда чогуу окушкан. Ал балдар нефрологу, өзү ортопед-травматолог. Ортолору бир жаш айырма бар, тагыраагы, волейболчу 30, келинчеги 29 жашта.
Оңолбек Каныбек уулу — КРдин волейбол федерациясы тарабынан "Мыкты спортчу", "Sports Awards-2015" версиясы боюнча "Мыкты волейболчу" аталып, андан сырткары, Улуттук лиганын чемпиону, Азиянын аймактык чемпиондугунун "Мыкты оюнчусу", Борбордук аймактын тандоо турунун "Мыкты оюнчусу" (2017, 2019), Дүйнө чемпиондугунун II тандоо турунун "Мыкты оюнчусу" (2018) аталган. Ошондой эле Таиланддагы "Эйр Форс" клубунда ойногон.
2018-жылы Азия оюндарынын ачылышында жалпы курама команда менен Кыргызстандын туусун көтөрүп баскан.