БИШКЕК, 30-июн. — Sputnik. Ош облусунун мусулмандар казысы болуп Сайдамир ажы Жейналиев дайындалды. Бул тууралуу муфтияттан кабарлашты.
Тиешелүү буйрукка Кыргызстан мусулмандарынын муфтийи Замир Ракиев кол койгон.
Жаңы дайындалган облус казысын муфтийдин орун басары Жоробай Шергазиев тааныштырып, ишине ийгиликтерди каалаган.
Эске сала кетсек, Ош облусунун буга чейинки казысы Самидин Атабаев кечээ Бишкекке казы болуп келди. Шаардагы бул кызматты азыр муфтий болгон Замир Ракиев аркалап жаткан.
Ал эми Сайдамир Жейналиев 2012-жылдан бери Аалымдар кеңешинин мүчөсү болуп эмгектенип келген.
1964-жылы 2-январда Тажикстандын Жерге-Тал районуна караштуу Кашка-Терек айылында төрөлгөн. Кыргызстан Ислам университетин "Араб тили жана шариат" адистигин артыкчылык менен бүтүргөнү айтылды.
Америкадагы мусулмандардын дин тутуу эркиндиги менен жакындан таанышуу максатында түзүлгөн "Эл аралык байкоочулар" (IOP) программасынын негизинде АКШнын бир канча шаарларында өткөрүлгөн илимий семинарларга катышып, тажрыйба алмашып келген.