БИШКЕК, 29-июн. — Sputnik. Бишкек шаарынын мусулмандар казысы болуп Самидин Атабаев дайындалды. Бул тууралуу муфтияттан кабарлашты.
Тиешелүү буйрукка Кыргызстан мусулмандарынын муфтийи Замир Ракиев кол койду.
Муфтий казыяттын ишмердүүлүгү жоопкерчиликтүү экендигин белгилеп, жаңы жетекчиге ийгилик каалаган.
Бишкектин казысы буга чейин Ракиев болчу. Ал муфтий болуп өткөн ишембиде Кыргызстан мусулмандарынын VII курултайында шайланды.
Самидин Атабаев буга чейин Ош облусунун мусулмандар казысы болуп эмгектенип келген. Ал 1973-жылдын 27-декабрында Өзгөн районуна караштуу Комсомол айылында төрөлгөн.
Диний жана светтик жогорку билимге ээ. Тагыраагы, Кыргызстан Ислам институтун, андан кийин Россия Ислам университетин ийгиликтүү аяктап, Ош мамлекеттик юридикалык институтунан юриспруденция адистигине ээ болгон. 1995-1996-жылдары аскердик кызматын өтөгөн.
Россияда жана Татарстанда куран жарышы боюнча өткөрүлгөн сынактарда биринчи орундарды камсыздаган. Мындан сырткары, волейболго кызыгат.
Орус, түрк, өзбек жана араб тилдеринде эркин сүйлөйт. Үй-бүлөлүү, эки уул жана үч кыздын атасы.