БИШКЕК, 26-июн. — Sputnik. Адам ысыкта күнүнө 1,5-2 литр суу ичиши керек. Ал эми жүрөк оорусу барлар 1 же 1,5 литр суу ичип турганы жакшы. Бул тууралуу кардиолог Юлия Гончарованын айтымына таянып РИА Новости жазды.
Адистин белгилешинче, суу менен катар эле калий менен магнийдин ордун толтуруп туруу үчүн адам рационго минералдык сууларды да кошушу керек. Ошондой эле жаңгактын түрү, чөп-чар, жашылча-жемиш аталган витаминдерге бай келе турганы айтылды.
"Эгер жүрөк жакшы болсо, анда күнүнө 1,5-2 литр жетиштүү. Эгер жүрөктө кандайдыр бир мүчүлүштүктөр болсо, анда 1-1,5 литр ичиш керек. Жүрөгү ооруган адамдардын көбү аталган органга күч келтирбеш үчүн күнүнө бир литрден ашык суу ичпегенге аракет кылышат. Бирок мындай кылган туура эмес. Кандай оору болбосун суюктуктун көлөмүн азайтууга болбойт", — деди Гончарова.
Адис ысыкта тер менен суу эле эмес, электролиттер да чыгып кетерин айткан. Ошол себептен калий менен магнийдин ордун толтуруп туруу үчүн рационго минералдык сууну кошуп, жаңгактын түрүн, жашылча-жемиш жеп туруу зарыл.
Кардиолог зарыл жумушу жоктор сыртка эртең менен же кечке маал гана чыгышы керек экенин эскерткен. Анткени өтө ысыкта көпчүлүктүн, анын ичинде жүрөк оорусу барлардын "организми кургап кетет". Кардиолог ысыкта сыртка, көчөгө чыкчуларга сөзсүз жанына суу алып жүрүүнү сунуштаган.