БИШКЕК, 24-июн. — Sputnik. Адамдар бирден же түгөйлөштүрүп үйүндө кармаган кадимки тоту куштардын жапайы түрүнүн асман бетин бербей миңдеп учуп жүргөн видеосу интернетке жарыяланды.
Аны борбордук Австралиядагы The Kangaroo Sanctuary коругуна барган эс алуучу тартып алган.
Кадрдан миңдеген канаттуулардын асманды каптап, кайра алыс кетип, ойкуп-кайкып, чурулдап учуп жүргөнүн көрүүгө болот.
"National Geographic Россия" сайтынын жазганына караганда, видеодогу тоту куштар Австралияда кеңири таралган куштардын түрү. Алар тынчы жок, шок, үнүн чыгарып көп сайрашат. Негизинен материктин жарым-жартылай ээн калган жерлерине уя салып, көбөйүшөт. Кээде алар миңдеп эмес, тобу менен чогулганда миллиондоп асманга көтөрүлөрүн айтып келишет.
"Мен жерде отурганда дал төбөмдөн миңдеген тоту куштар учуп, мени да айланып, ал тургай бутума конуп, кайра көтөрүлүп жүрүштү. Мен жай отуруп алып аларга көз салып турдум", — деп жазган видеонун автору.
Сайттагы маалыматтарга караганда, азыр бул куштардын эркиндикте жүргөндөрүнө караганда адамдардын колунда кармалгандарынын саны көптүк кылат.