БИШКЕК, 18-июн. — Sputnik. Өзбекстандын президенти Шавкат Мирзиёев Анжиян облусуна болгон иш сапарында үй-бүлөдөгү бактылуулук тууралуу кеп козгоду. Бул тууралуу Sputnik Өзбекстан маалымат агенттиги жазды.
Өлкө башчы Избаскан районундагы 830 аял эмгектенген кийим тигүү ишканасына барып, алар менен баарлашкан.
"Сиздерге сый-урматымды билдирем. Өз айылыңыздарда иш таап алганыңыздарга кубанып турам. Избасканда мындай заманбап ишкана жок болчу. Биз бул иштерди улантып, аялдар үчүн бардык шарттарды түзөбүз. Аялдын жумушу болсо жана маанайы көтөрүлүп турса, үй-бүлөсү да бактылуу болот", — деген Мирзиёев.
Дээрлик аялдар иштеген фабрика жакынкы убакта жумушчу орундарын 1200гө чейин жеткирүүнү пландоодо. Кийимдерди сатуу үчүн Россия жана Кытай менен келишим түзүлгөн.