БИШКЕК, 18-июн. — Sputnik. Бишкектин "Ала-Тоо" аянтында милициянын заманбап бөлүмү ачылып, ага ички иштер министри Улан Ниязбеков баштаган жетекчилер катышты. Бул тууралуу ИИМ кабарлады.
Ниязбеков башкы аянттагы милициянын бөлүмү капиталдык ремонттон өткөрүлүп, кызматкерлердин иштөөсү жана жарандарды кабыл алуусу үчүн бардык шарттар түзүлгөндүгүн белгилеген.
Ички иштер министри Улан Ниязбеков
© Фото / пресс-служба МВД КР
"Милиция кызматкерлери коомдук жайларда, көчөлөрдө, калк көп чогулган жерлерде коомдук тартипти жогорку деңгээлде камсыздап, сапаттуу иштөөсү абзел. Шаардын жашоочуларына жана конокторуна сылык мамиле жасап, мыкты сервистик тейлөөнү камсыздоо керек", — деген ИИМ башчысы.
Андан сырткары, туристтик милициянын ишмердүүлүгүнүн натыйжалуулугун жогорулатуу үчүн демөөрчүлөрдүн эсебинен алынган 10 электробайк тапшырылган.
"Бишкекте жакынкы күндөрү милициянын ушундай заманбап бөлүмдөрүн эс алуу жайларында, шаардын борбордук жерлеринде жана калк көп чогулган жерлерде ачуу пландалууда", — деп жазылган маалыматта.
Иш-чаранын аягында милиция кызматкерлери электробайктар менен кызмат өтөө үчүн жөнөп кетишкен.