БИШКЕК, 15-июн. — Sputnik. "Кумтөр Голд Компани" ЖАКнын эсебинен Нарын облусун өнүктүрүү фондун түзүү боюнча чечим кабыл алынды. Бул тууралуу президент Садыр Жапаров билдиргенин маалымат кызматынан кабарлашты.
Жапаров бүгүн, 15-июнда, Кумтөр кенинин иши менен таанышуу үчүн Ысык-Көлгө барды.
Мамлекет башчысы компаниянын эмгек жамаатын өлкө элинин кызыкчылыгы үчүн чын дилден жана абийирдүүлүк менен иштөөгө үндөдү.
Кумтөр кенинде мындан ары экология менен айлана-чөйрөнү коргоо маселелерине чоң көңүл бурула тургандыгын баса белгиледи. Ошондой эле ал "Кумтөр Голд Компани" ЖАКнын эсебинен Нарын облусун өнүктүрүү фондун түзүү боюнча чечим кабыл алынгандыгын билдирди", — деп айтылат маалыматта.
Садыр Жапаров кен толугу менен Кыргызстандын кызыкчылыгына иштеп баштагандыгы үчүн компаниянын бардык кызматкерлерин ишкананын мүлкүнө аяр мамиле жасоого чакырды.