БИШКЕК, 12-июн. — Sputnik. Бишкектин Свердлов районунун мурдагы акими Самарбек Болотбеков Нарын шаарынын мэри болду. Бул тууралуу Sputnik Кыргызстан агенттигине шаардык мэриянын маалымат катчысы Нурзада Мукашева билдирди.
Анын айтымында, жаңы мэрди тандоо үчүн шайлоо 11-июнда өткөн. Аталган кызматка эки талапкер көрсөтүлгөн. Бири "Таза-Нарын" муниципалдык ишканасынын жетекчиси Алмаз Суранов болсо, экинчиси Бишкектин Свердлов районунун мурдагы акими Самарбек Болотбеков.
Маалым болгондой, Болотбековдун талапкерлигин шаардык кеңештин көпчүлүк коалициясы көрсөткөн. Ал эми азчылык коалиция Сурановду сунуштаган. Добуш берүүнүн жыйынтыгында Болотбеков 19 добуш, ал эми атаандашы 12 добуш алган.
Болотбеков 37 жашта. Ал ордо калаадагы Свердлов районун 2016-жылдан 2019-жылга чейин башкарган. Ага чейин ал Бишкек мэриясында Жеке турак жай курулуш департаментинин жетекчиси болчу.