БИШКЕК, 11-июн. — Sputnik. Кыргызстанда сугат суу боюнча кыйын кырдаал түзүлдү. Бул туурасында "Суунун аздыгы Кыргызстанда баанын кымбатташы менен түшүмсүздүк кооптуулугун жаратышы мүмкүн" деп аталган Sputnik маалымат борборунда өткөн брифингде Жүгөрүчүлөр ассоциациясынын өкүлү Виталий Какштыкс билдирди.
"Быйыл сугат суу боюнча болуп көрбөгөндөй маселе жаралууда. Бүгүнкү күндө кырдаал бир топ эле кыйын. Бардык айыл өкмөттөрүндө суу тартыш. Абалдан чыгыш үчүн ар бир литр сууну текке кетирбей, көзөмөлгө алыш керек. Эгерде жүгөрүнү, кызылчаны сугарбасак, малды бакканга кеткен чыгымды эч нерсе менен жаба албай калабыз. Себеби фермерлердин көбү ишенип насыя алып, акчасын салган, бирок мунун баары азыр текке кеткени турат", — деди ассоциация өкүлү.
Кыргызстандагы ири айыл чарба кооперативинин башчысы Рысбек Иманалиев азыркы кыйын абалдын алдын алууга болот эле деген пикирин билдирди.
"Күзүндө эле мындай абал болорун билгенбиз. Нымдуулук аз болгон. Дыйкандардын көбү жерлерге тоңдурма кыла албай калган. Бул — кыйын абалдын мурда эле алдын алыш керектигинен кабар берген. Биз министрликте бир нече ирет болуп, сүйлөшкөнбүз. Жазында, мартта гана жаан-чачын өзүнүн ченеминде түштү. Январь, февраль, апрель, майда жамгыр жаабай туруп алды. Жакшы түшүм алыш үчүн системалуу мамиле болгону зарыл. Фермерлер арыкка ишенип отурбай, скважина казып, автоматташтырылган механикалык сугаруу ишине да даярданышы керек эле", — деди ал.
Иманалиев Советтер Союзунун учурундагыдай кылып Чүй облусунда скважина системасын кайра калыбына келтирүү зарылдыгын кошумчалады.
"100 литр суу менен арык системасы аркылуу адам 1-2 гектар жерди сугарат, ал эми автоматташтырылган ыкмада 15-20 гектар жер суу ичип калат", — деп белгилеген фермер.
Буга чейин Чүй облусунун фермерлери Sputnik агенттигине суунун жетишпегендигинен улам 100 миң гектар жердин алты миңи кургап калгандыгын айтышкан эле.