БИШКЕК, 9-июн. — Sputnik. Бишкекте дуатлон боюнча чемпионат өтүп, андан улам Түштүк магистралдын бир бөлүгү 13-июнда жабылат. Бул тууралуу Бишкек шаардык мэриясынын маалымат кызматынан кабарлашты.
"Масалиев көчөсүнүн түндүк тарабы тосулуп, түштүк жагынын батышты көздөй кеткен багыты гана ачык болот", — деп айтылган маалыматта.
Мэрия мындан улам шаардыктарды ал жекшемби күнү жүрө турган маршрутун алдын ала аныктап алуусун суранды.
Бишкекте дуатлон боюнча чемпионат өтүп, андан улам Түштүк магистралдын бир бөлүгү 13-июнда жабылат
Спорттук таймаш борбор калаанын түштүк тарабында, тагыраагы, "Ынтымак" паркында (Масалиев менен Айтматов көчөлөрүнүн кесилиш аймагында) өтмөкчү.
Иш-чара эртең мененки саат 7:00дөн 13:30га чейин болот.
Бул 12-15 жаштагы балдар үчүн "СуперСпринт" аралыгына, андан сырткары, жеке жана командалык эстафета менен "Спринт" аралыгында Кыргызстандын Триатлон федерациясы өткөрө турган таймаш.
Катышуучуларга ар кыл категориядагы медалдар ыйгарылмакчы. Иш-чарада 200 киши активдүүлүгүн көрсөтөрү дайын болду. Алардын арасында коңшу өлкөлөрдүн да спортчулары келмекчи.
Дуатлон боюнча жарыш адатта триатлон сезонун ачат, бирок COVID-19 боюнча оор кырдаалдан улам жайга жылдырылган.
Дуатлон – триатлондун үч этаптан турган бир дисциплинасы. Анын катышуучусу аталган этаптардын баарынан токтобой өтүшү керек.