2020-жылдын жыйынтыгы менен 10 миллион 78 миң балыктын чабактары Ысык-Көл, Соң-Көл жана Орто-Токой суу сактагычына коё берилди. Мындай маалыматты Маил Алиаскаров Sputnik Кыргызстан радиосунун эфиринде маек куруп жатып билдирди.
Анын айтымында, экосистемадагы жоголуп бара жаткан балыктардын санын калыбына келтирүү максатында БУУнун Азык-түлүк уюмунун жардамы менен да иштер жүрүүдө.
"Мамлекеттик, республикалык маанидеги суу сактагычтарды, көлдөрдү балыктандыруу Балык чарба департаментинин түздөн-түз функционалдык милдеттенмелерине кирет. Азыркы рыноктук шартта биздин мыйзамдык актыларга өзгөртүүлөрдү киргизип, учурдун талабына жараша тиешелүү нормативдик-укуктук актыларды кабыл алуунун үстүндө иштеп жатабыз. Буга чейин үч мыйзамдык актыга өзгөртүү киргиздик. Мындан тышкары, 2019-2023-жылдарга карата беш жылдык мөөнөткө аквамаданиятты жана балык уулоого багытталган программаны кабыл алдык. Анда аткарыла турган иштер так көрсөтүлүп, каржылоо булактары да аныкталган. Балык өндүргөн фермерлер үчүн программанын артыкчылыгы суу сактагычтар, көлдөр мурда 10 жылга колдонууга берилип келсе, эми 25 жылга пайдалануу укугун берүү каралган. Бул мыйзам күчүнө кирип, тиешелүү токтомдор боюнча иш жүрүп жатат. 2020-жылдын жыйынтыгы менен 10 миллион 78 миң балыктын чабактары Ысык-Көл, Соң-Көл жана Орто-Токой суу сактагычына коё берилди. Экосистемадагы жоголуп бара жаткан балыктардын санын калыбына келтирүү максатында БУУнун Азык-түлүк уюмунун жардамы менен да иштер жүрүүдө", — деди Алиаскаров.
Ошондой эле адис Ысык-Көл жана Соң-Көлдө илимий-изилдөө иштери жүрүп, эндемикалык балыктарды сактап калуу боюнча чаралар көрүлүп жатканын кошумчалады.