БИШКЕК, 5-июн. — Sputnik. Өкмөттүн Баткен облусундагы өкүлү Абдыкерим Алимбаев менен Тажикстандын Согд облусунун башчысы Раджоббой Ахмадзода телефон аркылуу сүйлөштү. Бул тууралуу облустук администрациянын маалымат кызматы билдирди.
Облус башчыларынын тапшырмасы менен чектеш жайгашкан Баткен — Исфара, Лейлек — Гафуров райондорунун акимдери да жолугушкан.
"Жергиликтүү бийлик күч түзүмдөрү менен биргеликте чыр-чатактардын алдын алуу, чек ара аймактарында коопсуздукту камсыздоо боюнча иш алып барууда", — деп айтылат маалыматта.
Ошондой эле өкмөттүн өкүлчүлүгү учурда Баткен облусунун Тажикстан менен чектешкен аймактарында абал тынч экенин, күч түзүмдөрү күчөтүлгөн тартипте иштеп, көзөмөл кылып жатканын билдирди.