БИШКЕК, 3-июн. — Sputnik. Бишкекте "Сапат" эл аралык билим берүү мекемесинин президенти Орхан Инандынын тезирээк табылышын талап кылгандар кайрадан митингге чыгышты.
Бул ирет Жогорку Кеңештин имаратынын алдына чогулуп, андан кийин Өкмөт үйүнө барышкан. Нааразычылык акциясына 200дөй адам чогулган. Алардын буга чейинки митингдери Түркиянын Кыргызстандагы элчилигинин имаратынын алдында өткөн.
Чогулгандар Инандыны тезирээк табууну талап кылышууда. Митингчилерге Жогорку Кеңештин айрым депутаттары чыгып, суроолоруна жооп беришкен.
Эске салсак, "Сапат" лицейлер тармагынын президенти, Кыргызстан жараны Орхан Инандынын 1-июндан бери дайынсыз болуп жатканы кабарланган. Бул маалыматтан кийин президент Садыр Жапаров аны издөө боюнча кошумча күч тартууну тапшырган. Инандынын автоунаасы 12-кичи райондо эшиги ачык калган тейде табылганы айтылып, атасынын жоголгону боюнча уулу арыз жазган.
Кийинчерээк УКМК Орхан Инандыны уюшкан кылмыштуу топтун мүчөлөрү издеп жүргөнүн маалымдаган.
ИИМ Инандыны тажрыйбалуу кызматкерлер издеп жатканын кошумчалады.