БИШКЕК, 2-июн. — Sputnik. Президент Садыр Жапаров Ош шаарынын мэри Таалайбек Сарыбашовду кабыл алып, түштүк калаада кайрадан өтчү шайлоодо аткаминерлерге административдик ресурстарды колдонууга жол бербөө тапшырмасын койду. Бул тууралуу өлкө башчынын маалымат кызматынан кабарлашты.
Президент Садыр Жапаров Ош шаарынын мэри Таалайбек Сарыбашовду кабыл алды
Жапаров шайлоонун ачык-айкындыгын толук камсыз кылууну талап кылды.
"11-апрелде өткөн жергиликтүү кеңештердин депутаттарын шайлоодо айрым жетекчилер өткөн окуялардан сабак албай, мыйзам бузууларга жол берди. Буга байланыштуу Бишкек, Ош жана Токмок шаарларында шайлоонун жыйынтыктары жараксыз деп табылды. Кайра шайлоого даярдык көрүү жана аны өткөрүү учурунда мыйзамдуулуктун, жарандардын укугу менен эркиндигинин, коомдук коопсуздуктун, санитардык-эпидемиологиялык талаптардын сакталышын камсыз кылуу боюнча бардык чаралар көрүлсүн", — деди Жапаров.
Мындан тышкары, президент Ош шаарынын тургундарынын жашоосуна түздөн-түз таасир этчү калааны өнүктүрүү программаларын өз убагында ишке ашыруунун зарылдыгын белгиледи.
Сарыбашов шаардыктардын жашоосун жакшыртуу, аларга жагымдуу шарттарды түзүү боюнча муниципалдык органдар тарабынан көрүлүп жаткан чаралар жөнүндө айтып берди.
Эске салсак, Бишкек, Ош жана Токмок шаарларында жергиликтүү кеңешке кайрадан шайлоо 11-июлга белгиленген. Буга чейин БШК аталган шаарларда өткөн шайлоонун жыйынтыгын жокко чыгарган чечим кабыл алган.