Куткаруучулар эки күндүк даярдыктан өткөрүлөт. Акысы 500 сом. Биринчи жолу окуп жаткан куткаруучу 3400 сом төлөп, он күн даярданат. Жөнөкөй адамдар келип да окуудан өтүп, сертификат ала алышат. Ал үчүн сүрөт, медициналык справкасын даярдап алып ӨКМдин же Суучулдар кызматынын башчысына арыз жазышы керек жана адамдын сууда сүзүү жөндөмдүүлүгү болушу зарыл. Бул тууралуу Замир Жумаков Sputnik Кыргызстан радиосунун эфиринде маек куруп жатып билдирди.
Анын айтымында, 1-июндан баштап сууга түшүүдөгү коопсуздук эрежелери боюнча окутуулар башталат.
"Бишкек шаарындагы сууга түшүүчү жабык, ачык бассейндер каттоого алынып, инвентаризациядан өткөн. Азыр Бишкек мэриясынын "Шаардагы парктар" башкармалыгына тиешелүү үч көлмөгө гана түшүүгө уруксат берилген. Алар алты куткаруучуну окутуудан өткөрүп берүүнү суранышты. Ал эми Чоң Чүй, Ала-Арча, Аламүдүн, ЖЭБден чыккан ар кандай каналдар жана башка ушул сыяктуу сууларга түшүүгө тыюу салынат. 2021-жылдын башынан 28-майга чейинки статистиканы алсак, республика боюнча 22 адам сууга чөгүп кетти. Алардын тогузу эркек, дагы тогузу 12 жашка чейинки балдар, бирөө аял, ал эми калган үчөө өспүрүм балдар. Былтыр ушул убакта 16 киши сууга чөккөн. 2019-жылга салыштырмалуу 2020-жылы карантинден улам кырсык аз катталды", — деди Жумаков.
Адис адамдарды сууга өзүнүн мүмкүнчүлүгүнө карап түшүп, сүзө албаса кооптуу жерге барбай эле коюуга жана ата-энелерди балдарын кароосуз калтырбоого чакырды.