БИШКЕК, 29-май — Sputnik. Дерматолог Татьяна Егорова "Известия" басылмасына маек куруп жатып сулуулук салонунан жугуп калчу эң кооптуу илдет жөнүндө айтып берди.
Маалыматка караганда, салондо макияж жасатуу учурунда демодекоз дарты жугуп калышы мүмкүн.
"Сулуулук индустриясындагы көпчүлүк кызматкерлер кардарларга спонж сыяктуу майда-чүйдө буюмдардын, шаймандардын эскисин эле колдоно берет. Демек, мурдагы кардардын оорусу башка кардарга өтүп кетиши толук мүмкүн. Көпчүлүк учурда салондон демодекоз дарты жугат. Ал өтө узак жана кымбат дарыланууну талап кылган жагымсыз оору", — деди адис.
Демодекоз — бул Demodex тобуна кирген кенелер козгоочу илдет. Көбүнчө чач, каш, кирпик жана май бездеринде болот. Беттин териси менен сурмаларды жабыркатат. Териге кызыл бүдүрлөр чыгып, кычыштырат. Жаңы пайда болгон учурда бир айдын ичинде дарылап кетирип салса болот. Өтүшүп кетсе, 6 айдан бир жылга чейин дарыланууга туура келет.