БИШКЕК, 28-май — Sputnik. ӨКМдин суучулдарды даярдоо жана суу алдындагы техникалык жумуштарды өткөрүү борборунун эки кызматкери Казакстанда эксперт-машыктыруучу катары тренингдерди өтүүдө. Бул тууралуу министрликтин маалымат кызматы кабарлады.
Приозерск шаарындагы Суучулдарды даярдоо республикалык окуу борборунун базасындагы "Балхаш" акваториясында башталган машыгуу 6-июнда бүтөт.
Тренингдин жүрүшүндө катышуучулар билимин, чеберчилигин көрсөтүп, тажрыйба алмашат.
Эки жумалык тренинг Жарандык коргонуунун эл аралык уюму тарабынан уюштурулган. Ошондой эле уюштуруу ишине Россия ӨКМинин Жарандык коргонуу академиясынын машыктыруучу-эксперттери дагы тартылган.
Курстун аягында Казакстандын Өзгөчө кырдаалдар министрлигинин суучул-куткаруучулары тарабынан сертификаттар ыйгарылат.