2022-жылдын январынан баштап чет өлкөгө учак менен чыгып жаткан адамдардын өмүрүн жана саламаттыгын милдеттүү камсыздандыруу полиси талап кылынат. Ал эми аталган полисти унаа менен кетип жаткандардан 2023-жылдын 1-январынан тартып талап кылуу пландалууда. Бул тууралуу Медер Рахман Sputnik Кыргызстан радиосунун эфиринде маек куруп жатып билдирди.
Анын айтымында, чет өлкөгө кетип жаткан жарандардын өмүрүн жана саламаттыгын милдеттүү камсыздандыруу боюнча мыйзам алгач пилоттук негизде иштейт.
"Жогорку Кеңеште мигранттардын өмүрүн жана ден соолугун камсыздандыруу боюнча мыйзам долбоору талкууга коюлду. Анын максаты — чет өлкөгө кетип жаткан жарандардын өмүрүн жана саламаттыгын милдеттүү камсыздандыруу, каза болгон мигранттардын үй-бүлөсүнө материалдык жардам көрсөтүү аркылуу мамлекеттик бюджеттин жүгүн азайтуу. Бул мыйзам долбоору 18 жашка толгон бардык жарандарды чет өлкөгө саякаттоодо жана иштегени барганда өмүрүн жана ден соолугун камсыздандырууга милдеттендирет. Аталган багыттагы камсыздандыруу бир, үч же беш жылга түзүлөт. Кааласа узартып алса болот. Камсыздандырылуучу жылына 400 сомдон ашпаган суммада каражат төлөйт. Эгер ал көз жумса, камсыздандыруу компаниясы 250 миң сом өлчөмүндө компенсация төлөп берет. Ал эми иштеп жатып жаракат алса жана аны тастыктаган документтери болсо 100 миң сомдон кем эмес өлчөмдө төлөм белгиленет. Бул ишти өлкөдөгү бардык жеке камсыздандыруучу компаниялар аткара алышат. Алар бири-бирине атаандаштык жаратып, кызмат көрсөтүүсүн жакшыртып, камсыздандыруу төгүмүн аз, ал эми төлөнүүчү сумманы көбүрөөк сунушташы мүмкүн", — деди Рахман.
Ал мыйзам боюнча суицид, алкоголдук, баңгизат же психотроптук заттарды колдонуудан улам өлгөн учурда адам камсыздандырылбай турганын кошумчалады.
Подкасттын толук версиясын видеодон көрүңүз: