БИШКЕК, 21-май — Sputnik. Башкы прокуратура Бишкек шаарындагы 15 миллион сомго бааланган жер тилкелерин мамлекеттин эсебине кайтарды. Бул тууралуу башкы көзөмөл органдын маалымат кызматы билдирди.
Бишкектин Ленин райондук прокуратурасы Ак-Өргөө жана Арча-Бешик конуштарында беш жер тилкеси мыйзамсыз жеке жактарга берилип кеткен фактыларды аныктаган.
"Баш калаанын Ленин райондук администрациясынын кызмат адамдары тарабынан жер мыйзамдарынын талаптарын бузуу менен Бишкектин жолдорун кеңейтүүгө багытталган жердин эсебинен Ак-Өргөө конушунда турак үй куруу үчүн төрт тилке жеке жактарга берилип кеткен. Жалпы баасы 11 миллион 922 миң 880 сомду түзөт", — деп айтылат билдирүүдө.
Мындан сырткары, аталган райондук мамлекеттик администрациянын кызмат адамдары Арча-Бешик конушундагы 754 орундуу мектептин курулушу үчүн бөлүнгөн жер тилкенин 3 миллион 097 миң сомго бааланган бөлүгүн жеке тарапка мыйзамсыз өткөрүп беришкен.
"Жогорудагы жер тилкелерине мыйзамсыз берилген укук белгилөөчү документтерди жокко чыгаруу максатында прокуратура тарабынан сот органдарына прокурордук чара көрүү актысы киргизилип, толук канааттандырылды", — деп белгиленет прокуратуранын маалыматында.
Прокурордук текшерүүнүн жыйынтыгы менен жалпы наркы 15 миллион 019 миң 880 сомду түзгөн беш жер тилкеси мамлекеттин эсебине кайтарылды.