БИШКЕК, 20-май — Sputnik. Мындан ары Кумтөрдөн казылган алтын Кыргызстандын ичинде гана жүгүртүүгө чыгарылат, биринчи партиясын Улуттук банк сатып алды. Бул тууралуу "Кумтөр голд" компаниясынын убактылуу сырттан башкаруучусу Теңгиз Бөлтүрүк маалымат жыйында билдирди.
"Өндүрүлгөн алтынды Улуттук банкка сата баштадык. Мындан ары биздин алтын мурдагыдай болуп Швейцарияга чыгарылбайт, өлкө ичинде болот. Улуттук банк менен 29 миллион сомдук келишим түзүлүп, кечээ биринчи партиясын саттык. Ал каражат жакынкы күндөрү биздин эсепке түшөт. Эки айдын ичинде кырдаал жөнгө салынып, андан ары айына 50 миллион долларлык алтын чыгарып турабыз", — деди Бөлтүрүк.
Ал эми "Кумтөрдүн" ишмердүүлүгүн текшерген комиссиянын төрагасы Акылбек Жапаровдун айтымында, алтын сатып алууга даяр экенин мамлекетке таандык дагы үч банк билдирген. Ал сатып алууга кызыккандар аябай көп экенин кошумчалады.