БИШКЕК, 20-май — Sputnik. Бишкек мэриясына караштуу маркумдарды көмүү боюнча ишкананын кызматкерлери жалган документтерди жасап, Чоң-Арыктагы көрүстөндөн мүрзө бөлгөнү үчүн 1000ден 5000 долларга чейин акча алып жүргөн. Бул тууралуу УКМКнын маалыматы кызматы билдирди.
Кеп "Маркумду акыркы сапарга узатуу боюнча Бишкек агенттиги" деп аталган мамлекеттик ишкана туурасында жүрүп жатат.
"2021-жылдын 18-майында УКМК сотко чейинки өндүрүштүк материалдардын алкагында, маркумдун сөөгүн Чоң-Арык айылындагы консервацияланган көрүстөнгө коюу үчүн 40 000 сом өлчөмүндөгү акча алып жаткан жеринен Маркумду акыркы сапарга узатуу боюнча Бишкек агенттигинин кызматкерин кармады", — деп жазылган маалыматта.
Кармалган А.А. аттуу адам УКМКнын убактылуу кармоочу жайына киргизилип, тергөө иштери жүрүп жатат.
Атайын кызмат Маркумду акыркы сапарга узатуу боюнча Бишкек агенттигинин мындан башка да мыйзамсыз иштерге катышкан кызматкерлерин аныктоо боюнча иш-чаралар жүргүзүлүүдө.
Аталган агенттиктеги мыйзамсыз иштер буга чейин да болуп келгени маалым. Мурда Финпол ишканага түшпөй калган миллион сом боюнча кабарлаган эле.
Түштүк-батыш көрүстөнүнө 1973-жылдан бери маркумдар коюлуп келген. Башында анын аянты 69 гектар болчу. Кийин 300 гектардан ашып, сөөк коюуга орун калбай калган. 2021-жылдын 1-январынан тартып аталган жай расмий жабылган. Анын ордуна Аламүдүн районунун Гроздь айылынын аймагында башка көрүстөн ачылган.