БИШКЕК, 18-май — Sputnik. Кыргыз-тажик чек ара чырынан документтерин жоготкон Баткендин 17 тургуну жаңы паспорт алды. Бул тууралуу өкмөттүн аталган облустагы өкүлчүлүгүнүн маалымат кызматы кабарлады.
Билдирмеге караганда, чек ара жаңжалында документтерин жоготкондорго Мамлекеттик каттоо кызматынын өкүлдөрү жардам берип, жеринде документтерди кабыл алышууда.
"Бүгүнкү күндө ID-кард үлгүсүндөгү паспорт алуу үчүн 49, туулгандыгы тууралуу күбөлүк алуу үчүн эки, нике күбөлүгүн алуу үчүн бир жарандын арызы кабыл алынган. 18-майда 17 киши жаңы паспорт алды", — деп айтылат маалыматта.
Кырдаалга байланыштуу Мамлекеттик каттоо кызматынын Баткен шаарындагы Калкты тейлөө борбору (ЦОН) иштөө тартибин өзгөртүп, эртең мененки саат 8:00дөн кечки саат 20:00гө чейин иштеп жатканы кошумчаланды.