Алтын казынада жалпы 12 000 сааттык аудиоберүү бар. Анын 85 пайызы санариптештирилип, электрондук вариантка өткөрүлдү. Бул тууралуу Жамийла Маматова Sputnik Кыргызстан радиосуна маек куруп жатып билдирди.
Анын айтымында, алтын казынага киргизилгендер адабий жана музыкалык атайын көркөм кеңештин баасынан өтөт.
"Кыргыз радиосу 90 жылдан бери иштеп келе жатат. Алгач жалаң түз эфирлер болуп, далай залкарлар анын өнүгүүсүнө салым кошкон. 1960-жылы Исхак Раззаковдун учурунда маданий мурастарды сактап калуу максатында учурдагы алтын казынаны камтыган атайын борбор ачылган. Муну ачууда инженер Кадырбек Камбаровдун эмгегин айта кетүү зарыл. Ал Москва, Ленинград, Прибалтикага чейин барып, ал жактагы долбоорлорду алып келип Борбор Азияда жок студия ачууда эбегейсиз эмгек жасаган. Ошонун негизинде алтын казына топтолуп калган. Андан бери көптөгөн залкарлардын интервьюлары, чыгармалары жаздырылып келе жатат. Ага киргизилип жаткан материалдардын баары музыкалык жана адабий көркөм кеңештин кароосунан өтөт. Жакында эле манасчы Рысбай Исаковдун 250гө чукул манас айтуусу кабыл алынды. Анын баарын көркөм кеңеш менен биргеликте угуп, талдап текшерилди. Бул абдан чоң жумуш. Соңку учурда жалпысынан алтын казынадагы 12 000 сааттын 85 пайызы санариптештирилди. Мындан тышкары, чыгармалар боюнча жалпы маалыматты камтыган атайын электрондук каталог жазылууда, иштин 70 пайызы жыйынтыкталып калды. Анын ичинде симфониялык чыгармалар, опералар, фольклор жана башкалар бар. Ошондой эле Темиркул Үмөталиев, Аалы Токомбаев сыяктуу залкар инсандардын маектери сакталган. Азыркы акын, жазуучу, деги эле жалпы чыгармачыл адамдардын чыгармалары да жаздырылып калууда. Радио-пьесалар, спектаклдер жазылып, учурда дагы Кыргыз драма театрынын артисттери менен бул багытта иштер уланууда", — деди Маматова.
Ошондой эле ал аталган радионун жаш кадрларды өстүрүп такшалтууда ролу абдан чоң экенин кошумчалады.
Белгилей кетсек, быйыл Кыргыз радиосунун түзүлгөнүнө 90 жыл толду.
Подкасттын толук версиясын видеодон көрүңүз: