БИШКЕК, 11-май — Sputnik. Германиянын Кыргызстандагы Жаратылышты коргоо союзу (NABU) Нарын облусунун Кочкор районуна фотокапкан койгон. Ага кандай жаныбарлар түшкөнүн мекеменин маалымат катчысы Зарина Эсенбаева Sputnik Кыргызстанга айтып берди.
Билдирүүгө караганда, NABU уюмунун кызматкерлери Кара-Мойнок кырка тоолорундагы Сөөк суусу агып өткөн өрөөнгө 20 фотокапкан коюшкан.
"Фотокапкандар ак илбирстерге жана алардын тоют базасына мониторинг жүргүзүү үчүн орнотулган. Бүгүнкү күндө аба ырайы катаал болуп жатканына байланыштуу алты гана фотокапкандан маалыматтар алынды. Камерага ак илбирстен тышкары тоо эчки, сүлөөсүн, кашкулак, карышкыр, түлкү, коен, улар, кекилик жана карчыга тартылып калган", — деди Эсенбаева.
Анын айтымында, сүрөттөр 2020-жылдын ноябрынан 2021-жылдын апрелине чейин тартылган.
Кара-Мойнок тоо кыркалары Ички Тянь-Шанга карайт. Түштүк батышынан Сөөк суусу, түндүгүнөн Каракол, чыгышынан Кочкор, түштүгүнөн Суусамыр тектоникалык өрөөндөрү менен чектешет.