БАТКЕН, 10-май – Sputnik. Кыргыз-тажик чек арасындагы калктуу пунктуларга, анын ичинен Лейлек районунун Максат айылына Тажикстандын кол салуусунун кесепетинен улам өрттөлгөн үйлөр буздурулуп жатат. Бул тууралуу Sputnik Кыргызстан маалымат агенттигинин кабарчысы жеринен билдирди.
ӨКМдин Лейлек райондук бөлүмүнүн маалыматына ылайык, өрттөлгөн 83 турак жайдын учурда 28и буздурулуп, таштандылар Максат айылынын четиндеги таштанды таштоочу аймакка төгүлүп жатат.
Аталган айылга ӨКМ 21 чатыр тикти. Анда кол салуунун кесепетинен үйсүз калган үч бүлө жана ӨКМдин кызматкерлери жашап жатышат. Жеринде ысык тамак да уюштурулган.
Лейлек районундагы Катраң айыл өкмөтү жардам катары Максат айылына төрт боз үй тигип берген. Үйү өрттөнгөн жарандар бул боз үйлөрдө убактылуу баш калкалап турат.
Чатырлар тигилген аймакка атайын медициналык пункт уюштурулуп, анда үч кызматкер — дарыгер, медайым жана фельдшерден турган топ 24 саат бою тынымсыз иштеп, муктаж болгондорго медициналык жардам көрсөтүүдө. Тез жардам кызматы да уюштурулган.
Дарыгер Досбай Турдукуловдун айтымында, кайрылгандардын көпчүлүгү кан басымы көтөрүлгөндөр жана балалуу энелер.
Кабарчы жергиликтүүлөргө жеке тараптардан гуманитардык жардам көрсөтүү уланып жатканын белгиледи. Кайгуул милиция Максат айылынын аймагында кызматын өтөп жатат.