БИШКЕК, 9-май — Sputnik. Миллиардер Илон Маск Saturday Night Live деп аталган сатиралык берүүнү алып барып жатып эфирден психикалык жактан өнүгүүнүн бузулушуна алып келген оору менен жабыркай турганын айткан. Бул туурасында РИА Новости жазды.
Миллиардер өзүндө мындай илдет бар экендигин "Saturday Night Live берүүсүнүн Аспергер синдромуна тушуккандыгын мойнуна алып, ачык жар салган биринчи алып баруучусу болсом керек" деп билдирген.
Берүүнүн форматын эске алганда Маск бул боюнча тамашалап койгон болушу да ыктымал.
Аспергер синдрому адамды өмүр бою коштоп жүрө турган, социалдык чөйрөдө, коомчулукта — кишилер менен пикир алышууда, сүйлөшүүдө, сырткы дүйнөнү кабыл алууда кыйынчылыкты жаратканы менен мүнөздөлөт. Интернеттеги маалыматтарда Аспергер синдрому менен ооруган адамдар көбүнчө эмоцияга алдырып, өз сезимдерин аныктай албай калышары айтылган.