БИШКЕК, 9-май — Sputnik. Баткенде чек ара чырынан улам эвакуацияланган адамдар атайын уюштурулган транспорттор менен үйлөрүнө жөнөтүлдү. Бул тууралуу өкмөттүн Баткендеги ыйгарым укуктуу өкүлчүлүгүнүн маалымат кызматы кабарлады.
Билдирмеге ылайык, мындай чечимди облустук штаб кабыл алган.
"Баткен шаарында тогуз пунктуда убактылуу жашап жаткан эл менен өкмөттүн Баткен облусундагы ыйгарым укуктуу өкүлү Абдикарим Алимбаев жолугуп, чек ара аймактарында күч түзүмдөрү күчөтүлгөн тартипте иштеп жатканын айтты. Турак жайсыз калган үй-бүлөлөргө убактылуу үйлөр даярдалганын билдирди", — деп жазылат маалыматта.
Облус башчысы үйлөрдү калыбына келтирүү жумуштары башталганын айтып, биринчи кезекте элди турак жай менен камсыздоо аракети жүрүп жатканын белгилеген.
Баткендеги кыргыз-тажик чек арасындагы кагылыштан улам аймакта 40 649 адам эвакуацияланганы айтылды. Анын 16 147си аялдар болсо, 23 931и балдар.