БИШКЕК, 24-апр. — Sputnik. Борбор Азиядагы Америка университетинин президенти Эндрю Качинске Кыргызстандын Кылмыш-жаза кодексинин 268-беренеси ("Баңгизатын мыйзамсыз даярдоо, сатуу") боюнча шектелип жатканы тууралуу маалымдама берилди. Бул тууралуу ИИМден билдиришти.
Кечээ күнү Качинс суракка чакырылган. Милиция анын унаасы менен жашаган жерин тинтүүгө алган. Буга 12-март күнү Эндрю Качинстин аты жазылып, университеттин дарегине Дубайдан жөнөтүлгөн посылканын ичинен баңгизат чыкканы себеп болгон. Буга чейин Качинс Кыргызстанга психотроптук каражаттарды мыйзамсыз киргизүү иши боюнча күбө катары суралып жаткан.
"Аталган заттын үлгүсү изилдөөгө жөнөтүлгөн. Экспертизанын чыгарган корутундусуна ылайык, ал заттын курамында психотроптук заттар камтылганы аныкталды", — деп билдирди ИИМ.
БАУУнун президентине кылмыш жасоого шектелгени туурасында маалымдама тапшырылып, ал суракка келип туруу милдеттемесин алуу менен бошотулган.
268-берене боюнча кылмыш жасагандар VI категориядагы айыпка жыгылып (26 000-30 000 сом) же II категория менен эркинен ажыратылып (2,6-5 жыл), II категориядагы (10 000-14 000 сом) айып салынат.
Милиция Эндрю Качинсти суракка чакырууга жана башка тергөө иштерин жүргүзүүгө жетиштүү негиз бар экенин белгилейт.